Бөтә донья башҡорттары ҡоролтайының рәйесе Р.Т. Аҙнабаевтың отчет докладында ҡоролтайҙың мәғәриф һәм фән комиссияһы эшенә ыңғай баһа бирелде, рәхмәт. Ысынлап та, беҙҙең комиссия ағзалары 2012 йылда һөҙөмтәле эшләне, йыллыҡ план тулыһынса үтәлде.

       Ҡайһы бер эштәргә генә туҡталып үтәм. Беҙ Халыҡ-ара туған телдәр байрамын әҙерләүҙә һәм ҙур сара итеп «Нефтселәр» мәҙәниәт һарайында юғары кимәлдә үткәреүҙә ҙур роль уйнаныҡ. 2013 йылда ла уны әһәмиәтле ижтимағи– сәйәси сара итеп үткәрергә кәрәк, Халыҡ-ара туған тел байрамы бейеү һәм йырлау өсөн түгел, ә туған телдәрҙе һаҡлау һәм үҫтереү сараһы булырға тейеш. Ҡайһы бер коллегаларыбыҙ ошо проблеманан ситләшергә тырыша.

Торатау һәм башҡа шихандар тирәләй шау-шыуҙар бик ныҡ ҡуйырҙы. Тыныс йәшәп-ятҡан халыҡты ҡуҙғыттылар. Бигерәк тә 2012 йыл аҙағында килеп сыҡҡан хәлдәр ныҡ борсоуға һалды. Башҡортостан Президенты аппараты етәксеһе Балабанов, Торатауҙың тәбиғәт ҡомартҡыһы тигән статусы булыуына ҡарамаҫтан, разведка эштәре башларға тәҡдим итте. Ә был законға һыймаған хәл. Шуға күрә лә  2012  йыл аҙағында бер-нисә митинг һәм пикет уҙғарҙыҡ. Үткән йыл шихандарҙы һаҡлап алып ҡалыу,  был мәсьәләгә халыҡ иғтибарын  йәлеп итеү өсөн Торатауҙың һәм  Йөрәктауҙың тирә-яғын  таҙартыу эштәре алып барҙыҡ. Р.Юлдашев һәм “ Ҡурайсы” төркөмө, «Арғымаҡ” төркөмдөре менән берлектә байрамдар үткәрҙек. Халыҡтан ҡултамғалар йыйып, Башҡортостан Президенты Р.З.Хәмитовҡа, РФ Президенты В.В.Путинға, РФ Премьер-Министры А.Д. Медведевҡа хат яҙҙыҡ һәм уларға яуаптар алдыҡ. БР һәм РФ Тәбиғәт Министерствоһынан  “Шихандарға теймәйәсәктәр”, тигән яуап килде.