(Башҡарма комитет рәйесе урынбаҫары Б.Р.Күсәбаевтың

БДБҠ Башҡарма комитеты ултырышындағы сығышы)

        Райондарҙа һәм ҡалаларҙа үткән ҡоролтайҙарҙа ҡатнашыу, күбеһенең эше тураһындағы мәғлүмәттәр менән танышыу Бөтә донъя башҡорттары ҡоролтайы эшмәкәрлеген артабан әүҙемлештереү кәрәклеген  тағы бер тапҡыр раҫланы. Халҡыбыҙҙың төрлө ҡатлам вәкилдәре бөгөнгө донъяла үҙ урынын табыу, лайыҡлы тормош алып барыу өсөн юлдар эҙләй һәм ошо эштә беҙҙән дә бергә булыуҙы көтә.

(Ишембай районы башҡорттары ҡоролтайының башҡарма комитеты рәйесе Ә.Ғ.Фәйзүллиндың сығышы)

Халҡыбыҙҙың өс тағаны булып дине, теле һәм ере тора. Тарих төпкөлдәренә күҙ һалһаҡ, ул дин, тел, ер өсөн бер ҡасан да көрәшен туҡтатмаған. Ҡыҙғанысҡа ҡаршы, халҡыбыҙ өсөн хәүефле булған проблемалар бөгөн дә бихисап. Шуларҙың береһе - халҡыбыҙға көн итеү мөмкинлеге биргән ер мәсьәләһе. Ауыл халҡын мал көтөү, бесән әҙерләү урындарының етешмәүе, йүкәлектәрҙең, бигерәк тә һыу буйҙарының, йола буйынса байрамдар үткәреп, ял итә торған урындарҙың ситтән килгән кешеләр тарафынан ҡуртымға алыныуы хафаға һала. Күпмелер ваҡыттан һуң был ерҙәрҙе бөтөнләйгә юғалтыу ҡурҡынысы янай.