Беҙ, Урал батыр вариҫтары, халҡыбыҙҙың үткәне, бөгөнгө йәшәйеше һәм киләсәге тураһында кәңәшләшеү, етди һөйләшеү өсөн йыйылдыҡ. Маҡсатыбыҙ бер – халҡыбыҙҙы тергеҙеү, берләштереү, яҡын киләсәккә яңы бурыстар ҡуйыу.

Зәки Вәлиди үҙенең башҡорт халҡына васыятында милләтте тел, дин һәм ерҙәребеҙҙе һаҡлау йәшәтәсәк тип әйтеп ҡалдырҙы. Был мәсьәләләр бөгөн дә бик киҫкен тора.

Башҡорттарҙың аҫабалыҡ тарихы (вотчинное право) тамыры менән меңәр йыл тәрәнлегенә китә. Уралда йәшәгән бер халыҡтың да башҡорттоҡо һымаҡ аҫаба хоҡуғы булмаған. Тәүтормош ваҡытынан алып башҡорттар Уралда ойошоп йәшәй башлай һәм бөгөнгәсә көн итә. Башҡа халыҡтар кеүек яҡшы тормош эҙләп күсенеп йөрөмәгән, сөнки ул төп мөлкәте тип үҙенең аҫаба ерен иҫәпләгән. Ере башҡортто ашатҡан, эсергән, һаҡлаған, кейендергән, балаларын үҫтергән, телен, ғөрөф-ғәҙәттәрен һаҡларға ярҙам иткән.